ਗ਼ਜ਼ਲ/ਹਰਦਮ ਸਿੰਘ ਮਾਨ
ਰੰਗ ਸਮੇਂ ਦੇ ਵੇਂਹਦਾ ਚੱਲ।
ਸੰਗ ਸਮੇਂ ਦੇ ਤੁਰਿਆ ਚੱਲ।
ਕੰਡੇ, ਕੰਕਰ ਚੁਗਦਾ ਚੱਲ।
ਹਾਸੇ, ਖੁਸ਼ਬੂ ਵੰਡਦਾ ਚੱਲ।
ਉਚੀ ਸੋਚ 'ਤੇ ਪਹਿਰਾ ਰੱਖ
ਹੋ ਕੇ ਨਿਮਰ, ਨਿਮਾਣਾ ਚੱਲ।
ਜਿੱਥੇ ਕੂੜ ਹਨੇਰ ਦਿਸੇ
ਚਾਨਣ ਦੀ ਲੱਪ ਸੁਟਦਾ ਚੱਲ।
ਨਫਰਤ ਵੰਡਦੀ ਬਸਤੀ ਵਿਚ
ਗੀਤ ਪਿਆਰ ਦੇ ਗਾਉਂਦਾ ਚੱਲ।
ਸ਼ਾਇਦ ਗੂੰਗੇ ਹੋ ਗਏ ਲੋਕ
ਬੋਲ ਇਨ੍ਹਾਂ ਨੂੰ ਦਿੰਦਾ ਚੱਲ।
ਧੁੱਪ, ਤਸੀਹੇ ਜਿਸਮ ਉਤੇ
ਰੁੱਖਾਂ ਵਾਂਗੂੰ ਸਹਿੰਦਾ ਚੱਲ।
ਜੀਵਨ ਮਘਦਾ ਰੱਖਣੈ 'ਮਾਨ'
ਸੁਪਨੇ ਨਵੇਂ ਸਜਾਉਂਦਾ ਚੱਲ।
No comments:
Post a Comment